ՀՀ նախագահ Սերժ Սարգսյանը այսօր այցելեց Արարատի մարզի Այնթափ համայնքում իր հանձնարարականով կառուցված երկհարկանի մսուր– մանկապարտեզ և ծանոթացավ շենքային պայմաններին:

Երբևէ մանկապարտեզ չունեցող Այնթափ համայնքի երեխաները արդեն մեկ ամիս է, ի վերջո, հնարավորություն են ստացել իրենց գյուղում հաճախել մանկապարտեզ:

Այնթափի մսուր-մանկապարտեզի տնօրեն Էվելինա Վարդանյանը լրագրողների հետ զրույցում նշեց, որ արդեն մանկապարտեզ են հաճախում 144 երեխա՝ հենց այնքան, որքան կարող է ընդունել մանկապարտեզը:

«Ունենք 6 խումբ, որոնք բոլորը կահավորված են: Շենքը եզակի կառույց է, որն ունի հարմարավետ պայմաններ: Համայնքը տասնյակ տարիներ շարունակ մանկապարտեզ չի ունեցել: Նախագահի նախաձեռնությամբ մեր գյուղի կենտրոնում կանգնած է այս գեղեցիկ կառույցը: Մինչ այդ համայնքի երեխաները տրանսպորտով հարևան գյուղերն են գնացել»,- ասաց նա։

Էվելինա Վարդանյանն ավելացրեց, որ հարևան գյուղերից երեխաներ չեն կարող ընդունել, քանի որ մանկապարտեզի պահանջարկը գյուղում իրականում ավելի մեծ է:

Մանկապարտեզ հաճախող փոքրիկ Էլիզան Tert.am–ի հետ զրույցում նշեց, որ ինքը հաճույքով է գալիս մանկապարտեզ, որովհետև այն «շատ գեղեցիկ է ու շատ խաղալիքներ կան»:

Էլիզայի մայրիկը՝ տիկին Աննան, ով նաև աշխատում է մանկապարտեզում, գոհունակությամբ նշեց, որ վերջապես համայնքը ունեցավ մանկապարտեզ, և իրենք այլևս ստիպված չեն երեխաներին հարևան համայնքներ կամ Երևան բերել:

Նշենք, որ շենքի կառուցման համար պետական բյուջեից, Այնթափի համայնքային բյուջեից, «Գեոպրոմայնինգ Գոլդ» ՓԲԸ-ի և Հայաստանի Սոցիալական ներդրումների հիմնադրամի կողմից հատկացվել է 328 մլն դրամ։